Ford styrkir stöðu sína sem annar stærsti bílaframleiðandi í Evrópu

Síðustu ár hefur Ford bætt hlutfallslega stöðu sína á hinum evrópska bílamarkaði verulega og hyggur fyrirtækið á frekari sókn á næstu árum. Sú sókn mun fara fram með nýjum Ford Focus, sem frumsýndur var í vikunni í Detroit og kemur á markað á næsta ári, Ford Fiesta og Ford Mondeo sem eru vinsælustu bílar Ford í Evrópu. Reyndar var Ford Fiesta söluhæsti bíll Ford í Evrópu á síðasta ári og næst mest seldi bíllinn í Evrópu.

Sækja harðar

Árið 2009 hefur semsagt verið gert upp og leiða niðurstöðurnar í ljós að Ford hefur styrkt stöðu sína sem annar stærsti bílaframleiðandi Evrópu með 9,1% markaðshlutdeild sem er aukning um 0,5% frá árinu 2008. Ford er því einn þeirra bílaframleiðenda sem mitt í slæmu árferði er að bæta stöðu sína og er á sama tíma að fara í gegnum mikla endurnýjun svo hægt verða að herða sóknina.

Búast má við því að skriðþungi Ford muni því aukast gríðarlega í ár og á næsta ári. Í ár verða 11 nýir Ford bílar kynntir, þar á meðal nýir Ford Galaxy og Ford S-Max sem voru einmitt afhjúpaðir í Brussel fyrir skömmu og má því búast við að mikið verði um spennandi fréttir úr herbúðum Ford á næstunni.

Vinsælasti bíllinn í Bretlandi

Árangur Ford í Bretlandi vekur ávallt athygli en Ford fólksbílar hafa verið vinsælustu bílarnir í Bretlandi 33 ár í röð og atvinnubílar Ford hafa verið þeir vinsælustu 45 ár í röð með heildarmarkaðshlutdeild upp á 16,8%. Þetta er gríðarlega góður árangur og að mörgu leiti ekki síðri en árangur Ford í Bandaríkjunum þar sem F150 pallbíllinn hefur verið mest seldi bandaríski bíllinn í 23 ár og mest seldi pallbíllinn í 31 ár með yfir 16 milljón eintök seld.

Það er ljóst að viðskiptavinir bera mikið traust til Ford enda er byggt á öruggum grunni. Fyrirtækið hefur ennfremur alla burði til þess að bæta sína stöðu á næstu árum því margir aðrir bílaframleiðendur hafa glímt við mikinn samdrátt og vandræði í rekstri. Undir stjórn Alan Mulally hefur nýrri stefnu Ford verið fylgt en hann hyggst sameina krafta Ford undir átakinu „One Ford“. Meðal verkefna þar er að beina athyglinni að millistærðarbílum og sparneytnari bílum og þannig marka skýra braut inn í framtíðina því Ford hyggst ekki síður láta kveða að sér á 21. öldinni en þeirri 20.