Ford Fiesta fær flotta einkunn hjá Top Gear

Ford Fiesta hefur farið sigurför um heiminn undanfarið, bíllinn var mest seldi bíll Bretlands á síðasta ári, næst mesti seldi bíllinn í Evrópu á heildina litið og um þessar mundir er Fiesta að fara að leggja undir sig Bandaríkin sem fyrsti algjörlega evrópski smábíllinn sem leggur þar land undir fót um mjög langt skeið.

Síðan 1976 hafa verið seldar tólf milljónir eintaka af Ford Fiesta og því er ljóst að afar margir deila skoðunum Top Gear á þessum knáa smábíl, sem er reyndar ekki svo smár lengur en þó ávallt knár.

Ofursmábíll fyrir þig

En hvað segja þeir nákvæmlega hjá Top Gear um Ford Fiesta bílinn? Í stuttu máli þá segir Top Gear að bíllinn komi Ford aftur á toppinn í þessum stærðarflokki bíla sem Top Gear kallar „Supermini“. Þ.e. stærri gerðir smábíla sem eru í ákjósanlegri stærð fyrir þá sem vilja kaupa smábíl sem þó er nógu stór til að duga sem eini bíll heimilisins – þessu mætti snara á okkar ylhýra sem „ofursmábíl“.

Þá þykir Ford Fiesta hafa aksturseiginleika sem skari langt fram úr samkeppninni en þar er verið að tala um bíla eins og Fiat Sedici, Fiat Grande Punto, Kia Rio, Honda Jazz og Renault Clio.

Reyndar er talað um að Ford Fiesta virki í akstri sem bíll í næsta stærðarflokki fyrir ofan. Rými bílsins er gott, aksturseiginleikarnir á pari við mun dýrari bíla, útlit bílsins þykir hreint út sagt snjallt í þriggja dyra útgáfunni, sérstaklega þegar einhver hinna glæsilegu og björtu nýju lita er valinn á bílinn.

Þá þykir gæðatilfinningin innandyra hafa aukist verulega en punkturinn yfir i-ið eru framúrskarandi aksturseiginleikar, nokkuð sem Ford hefur iðulega getað flaggað síðastliðin ár. Hinsvegar ber svo við nú að Top Gear segir aksturseiginleikana vera mun betri en bíll í þessum stærðarflokki „hefur rétt til“.

Hagkvæmur í rekstri

Eins og sönnum Top Gear dómi sæmir er óskað eftir kraftmeiri útgáfu af Ford Fiesta en hún er einmitt á næsta leiti því búist er við að ST útgáfan komi á markað innan tíðar. Með 1,6 lítra bensínvél þykir bíllinn hinsvegar mátulega sprækur en umfram allt er hann hagkvæmur. Tekið er sérstaklega fram að ódýrt sé að tryggja bíla af þessari gerð, þeir séu ódýrir í viðhaldi og auðveldir í viðgerðum. Þessu til viðbótar fæst bíllinn í Econetic útgáfu sem aðeins losar 99 g/km af CO2 og er hann því fáanlegur visthæfur í ofanálag. Reyndar má minnast á að tímaritið Autoexpress gaf Econetic útgáfu bílsins fullt hús stiga.